Минтақаи озоди иқтисодии “Кӯлоб” тавассути ҷалби сармояи дохиливу хориҷӣ ва татбиқи лоиҳаҳои самарабахш бояд солҳои наздик ба рушди шаҳри Кӯлоб ва минтақа такони ҷиддӣ бахшида, боиси таъсиси ҳазорҳо ҷойи нави корӣ ва баланд шудани некӯаҳволии сокинон гардад.

Ҷалби сармоя ва технологияҳои пешрафта барои бунёди корхонаҳои нави саноатӣ ва ба кор даровардани иқтидорҳои нави истеҳсолӣ дар ҳудуди МОИ «Кӯлоб» ба рушди соҳаҳои гуногуни хоҷагии халқ мусоидат намуда, дар татбиқи ҳадафи чоруми миллӣ, яъне саноатикунонии босуръати мамлакат, таъсиси ҷойҳои нави корӣ ва беҳтар намудани сатҳу сифати зиндагии аҳолӣ заминаи устувор мегузорад.

Мо ифтихор дорем, ки ширкати мо нахустин шуда, ҳамчун субъекти Минтақаи озоди иқтисодии “Кӯлоб” ба қайд гирифта шуд ва мо тасмим гирифтаем, ки дар ҳудуди минтақаи мазкур корхонаи истеҳсоли қисмҳои эҳтиётии автомобилро бунёд намоем. Имтиёзҳои андозию гумрукӣ ва шароитҳои дар МОИ “Кӯлоб” муҳайё гардида, ба мо имконият медиҳад, ки тамоми нерӯи худро баҳри истеҳсоли маҳсулоти босифати воридотивазкунанда ва ба содирот нигаронидашуда равона намуда, баҳри афзоиши иқтидори содиротии кишвар саҳми арзандаи худро гузорем.